هكذا نعت ماجدة الرومي ملحم بركات

حلووول – في 30-10-2016 آخر تحديث 21,50

نشرت الفنانة اللبنانية ماجدة الرومي على صفحتها الرسمية في شبكات التواصل الاجتماعي نعيا لزميلها الفنان ملحم بركات الذي غيبه الموت بعد صراع مع المرض يوم 28 أكتوبر. وودعت ماجدة الرومي ابن ضيعتها بقلب مكسور، قائلة:

من ماجدة الرومي الى ملحم بركات

مبارح،
من عَزا إمي للعَزا فيك ومن دير القرقفي كفرشيما لكنيسة مار بطرس وبولس كفرشيما
قطعت المسافة بضيعتنا الصغيرة وانا قلبي عم يعصرو الاسى وانا عم بسمع صوتك طالع من كل شارع وحي..
وصوتك نفسو نفسو يا ملحم يلي فرّحني العمر كلّو مبارح نفسو نفسو ما ترك بعينييّ دمعة وحدة إبْكِيها.
وهيي نفسها نفسها شوارع كفرشيما يا ملحم يلي تمشّينا عليها بضيعتنا صغار وزهّرتلنا صغار وضحكتلنا صغار وهديتنا كل ربيع وكل أمل هيي نفسها نفسها مبارح شفتها خريف حزين مستعد يرمي كل وراقو ويبكي معنا ويكتب معنا ع صفحة تشرين الاول ٢٠١٦ :
(كلّو رايح وج الله بس وحدو اللي باقي) ..
وشفت الدنيا حزينة عليك مثلنا وبتحبّك مثلنا ورح تشتقلك مثلنا وتقول لكل جيل جايي بعدنا
إنك من أعظم الاصوات يلي مرقت على هالشرق إنك صوت اذا رَق

بيبكّي الحجر واذا جن بتنحِنيلو العاصفة واذا تجلّى بتِخْضَر فينا جَنّات وانك جملة لحنية متفوّقة عريقة رح تبقى درس بالاصالة لكل عاشق موسيقى اليوم وكل يوم ولتنتهي الايام ..

ابو مجد يا حبيب اللبنانيي وكل العرب يا ابن كفرشيما البار مهما بعّدتنا الايام رح نرجع نلتقى هيدا إيماننا بالله
وحتى نلتقى لنغني للابد أمجاد الرب
بسألك بمحبّة طالعة من نص قلبي تِقبَل منّي بهاليوم الحزين كتير
تقديري العظيم لفنك الاصيل لصوتك العالمي ولكل يلي كنتو بهالحياة ..

ماجدة الرومي
كفرشيما
في
30/10/2016

وقد تفاعل مع المنشور أزيد من 18 ألفا من عشاق ماجدة الرومي وملحم بركات وتم اقتسامه بشكل مكثف على شبكات التواصل الاجتماعي.

والجدير بالذكر أن الفنان الراحل ملحم بركات تعاون مع الفنانة ماجدة الرومي في أغنيتين عرفتا نجاحا كبيرا وهما: “وبتتغير الدقايق”، من ألبوم ماجدة الرومي الأخير “غزل” الذي نزل في 2012 وهي من الأغاني الأوركيسرالية الضخمة، و”اعتزلت الغرام” التي تعد نقلة نوعية في مسيرتها الفنية، والتي كانت عنوان الألبوم في 2006.